ماكيير مسلسل «الاختيار 3» يكشف رد فعل ياسر جلال بعد رؤية ملامح شخصية الرئيس السيسي

قال الماكيير أحمد مصطفى (ماكيير الاختيار 3): «بدأت شغل ماكياج في الإعدادية مع خالي الماكيير الشهير أحمد مرتضى وأحببت الموضوع جدا، وتعاملت مع الماكيير محمد يوسف وكنا بنشتغل مع بعض بنظرة العين، وبنرتاح جدا في التعامل مع بعض».

وأضاف خلال حواره لبرنامج “حالو معانا” الذي يذاع على” نغم اف ام ” قائلا: «أهم حاجه للماكيير إن عينه تصدق اللي بيشوفوا، ولو أنا كماكيير عملت شغلي كويس جدا والممثل غير قدير شغلي مش هيبان، وأحب أن أشكر المخرج الدكتور بيتر ميمي على ثقته في التعامل معي».

وعن تحدي الشخصيات في الاختيار 3 قال: «كان بسبب المرحلة اللي كانت من 2012 إلى 2013 لأن فيه ناس شكلها اتغير والمشاهد هيقارن وكان لازم نذاكر كويس وبدأنا نجيب صور وفيديوهات للشخصيات، وبدأت أكتب الخطوات اللي هعملها لكل شخصية، والتحدي كان أكبر بالنسبة لي وهو طلب دكتور بيتر ميمي إنه مش عاوز مكياج أوفر ويكون بسيط، فقط روح الشخصية وعلى الممثل الأداء مع اللبس فكل حاجة تكمل بعض».

ووجه الشكر للنجم الكبير ياسر جلال الذي جسد شخصية الرئيس عبد الفتاح السيسي وقت أن كان وزيرًا للدفاع، قائلاً «أبدى استعدادا كبيرا لحلاقة الجبهة الأمامية والذقن في سبيل إن الشخصية تطلع صح ودي وفرت وقتا وجهدا كبيرا لينا وليه، و ياسر جلال كان بيحاول يمرن عضلات وجهه وهو بيعمل الميك آب فبتظهر خطوط من خلال ريأكشانات وشه وده ساعدنا جدا في تنفيذ الألوان على كل تفاصيل الوجه».

أما عن رد فعل الفنان ياسر جلال فقال: «أخدنا بالحضن أنا والكوافير»، ومن أهم مميزاته كفنان أنه عاش الشخصية ومش بيقلدها.

وعن عبقرية الأستاذ خالد الصاوي فقال «كانت متمثلة في طريقته وأدائه فعمل للشخصية كيان وقربها للمشاهد، وحاليا بنغزل الذقن بدل من إننا نجيبها قطعة واحدة وده بيريح الممثل جدا في أدائه وتعبيراته».

واختتم قائلا :«إحنا بلد كبيرة ومن أقدم الدول في صناعة السينما في العالم».